...

"صباح الخير او مساء الخير مش مهم ،،، 

اما بعد .. يسرني يارفاق ان اخبركم شوية حاجات عن المذاكرة والواجبات - اسأل مجرب وﻻ تسألش حلاق الصحة - الواجب من غير كتاب الاجابات مايكون مفتوح ومنور المكتب جمبك كده .. ملهوش طعم 
ولو عاوز تنقل من كتاب الاجابات متنقلش بالنص وتبقى غبي .. 
حط التاتش بتاعك .. 

المذاكرة من غير تويتر او فيس بوك او اي هري جمبك .. تفقد مسخرتها وتصبح شئ ملهوش ﻻزمه اكتر من ان هو ملهوش ﻻزمة بالفعل ..

المواد اللى بتعتمد على الحفظ ( تاريخ عربي علم نفس ) او ماشابه ذلك حاول قبلها تضرب خناقة مع ابوك او امك وهتلاقيك بتحفظ بغباء ..
" ملحوظة : خلي الخناقة بعد الغدا عشان لو قبله انت الخسران "

بالنسبة للرياضة والفيزيا والمواد اللي فيها تشغيل دماغ .. اسمع نوع الاغاني او المزيكا اللى بتحبها عموما هتلاقي الموضوع ماشي كويس معاك ..

متعملش جدول مذاكرة زي الدحيحة مابيقولولك .. ده مشروع فاشل مصيره الحتمى الشطب او الرمي في الباسكت اللى تحت المكتب
" لو معندكش باسكت تحت المكتب ارميه في زبالة المطبخ من ورا امك .. "

قوم من النوم وانت كلك تفاؤل انك هتخلص اللى وراك .. اي نعم مبيخلصش بس التفاؤل حلو مفيش كلام وفي البلد دي اصبح معجزة ..

صباح الهري :)"

ما بعد ثورتنا المجيده

صباح الخير او مساء الخير .. تحية لابد منها رغم ان مفيش " خير "  .. طاب يومكم .. رغم ان بردو مفيش فايدة ..

 المهم ،،

مصر اتغيرت بعد الثورة .. ده حقيقي 

الدم بقى ارخص من الاول

، الكرامه انعدمت وبقت بالسالب ،

الشباب مكانهم الاول كان القهاوي انما دلوقتي مكانهم المقابر 

تويتر الاول كان بينش وكان للصفوة .. دلوقتي كل مصر بقت عندها تويتر اكونت 

البنات اللى مكانوش يعرفوا حاجة غير تامر حسني وافلام السبكي .. حاليا بيتكلموا فى السياسة وبيقولوا الاخوان وحشين

اللجان الالكترونيه بقت على قفا مين يشيل ...

مدرجات الاستاد كانت مكان للتشجيع بقت مكان لشتيمة العسكر واخيرا مسرح جريمة

 الاخوان كانوا بيتسحلوا فى السجون طلعوا خدوا الحكم وبدأوا يسحلوا الشعب

الداخليه كانت بنت كلب اصبحت بنت وسخة واخيرا ****

 ميدان التحرير كان من مناطق الزحام الرهيبه فى القاهرة اصبح مكان للتظاهر ثم مكان لمقابلة الاصدقاء فى اوقات الفراغ ثم تلوث بالاخوان والسلفيين واخيرا احسن مكان يروحه مُتحرش

السينما كانت فيها بعض التجاوزات دلوقتي السينما لو الفيلم مكتوب عليه " للكبار فقط " تلاقي الكبار نفسهم بيتكسفوا يشوفوه 

الاطفال كانوا الاول بيقولوا لبعض يا كلب وياحمار دلوقتي ماشاء الله بيسبوا الدين

الحزب الوطني كان واكلها والعه حاليا الحريه والعداله واكلها وواكلنا احنا شخصيا .. 

القضاء كان واطي حاليا بقى ابن 60 * 70 ومين يزود .. 

كل من كان مع مبارك قبل الثورة بعدها قال البلد دي عاوزة واحد عسكري بعدها شتم العسكر فى الزيطة بعدها جاي يعمل ثوري على ابونا

الاول كان المواطن بيتسحل فى اقسام الشرطه بس دلوقتي بيتسحل فى اى مكان فى شوارع مصر

الاول كان العالم كله بيشتمنا الى حد ما بعد كده نسبة الشتيمة زادت بعد كده بقينا نشتم المتظاهرين واخيرا بقينا نشتم نفسنا بالاب والام 

قبل الثورة كان التفاح والبرتقال من اكتر الحاجات اللى عليها اقبال بعد كده بياعين الليمون مبقوش ملاحقين من كتر ما بنعصر ع نفسنا ليمون عشان نتحمل البلاوي دي 

قبل الثورة البرادعي خاين وعميل الامريكان بعد الثورة البرادعي خاين وعميل الامريكان وهو اللى خربها .. واخيرا البرادعي نمساوي عايش فى عالم تويتر 

قبل الثورة كان فى امل فى البلد دي وشعبها .. بعد الثورة اصبح الحل الوحيد من اجل حياة افضل

 لا .. مش تنظيم الاسره الحل ..

نسف مصر بما فيها من شعب ومنشآت .. ونبدأ من جديد على نضافه بقى :)

عارفه .. ؟

عارفه .. ؟
كان ممكن لو زعلتك .. تعاتبيني
كان ممكن بذوقك .. تحرجيني
بكلامك الحلو اللى عودتيني عليه ..
تغلبيني ..

عارفه ..؟
مستغربه ان انتي .. اللي تزعليني
وابقى زيي زي كل الناس .. تعامليني

عارفه ..؟
انا اسفه مش هينفع اقولك استنيني ..
الانتقام مش عاده فيا .. بس
انتي علمتيني ..

مسيبش حقي .. لو على رقبتي
حتى لو اللى مزعلني .. هو انتي
و اللي يزعلني .. لازم
احسسه بقيمتي ..

عارفه .. ؟
من زعلي خايفه عليكي مني ..
عشان دايما
بخاف عليكي لأني ..
في جنوني بخاف ازعلك .. ابعدك عني

عارفه .. ؟
فايتك كتير فيا ..
ازاي فاهمه انك فهماني
كأنك دلوقتي بتتعرفي عليا ..
وانا اللى كنت فكراكي نصي التاني !

مصري اصيل

 المصري الاصيل هو .. 
( الكلام مفيهوش تعميم اوى نقدر نقول 90 % منهم كده )

- اللى عاوز مراته تلبس واسع ومحترم وطرحه كبيره ويبص فى التليفزيون على هيفا ونانسي ويقولها بكل براءه : " شايفه .. شايفة الستات اللى بجد " !

-اللى عاوز يعرف بنت واتنين وتلاته وعشره - كل البنات بتحبك كل البنات حلوين - واما يتجوز يقول بنفس البراءة " متجوزش واحده مشيت معاها " !

- اللي عاوز يرجع من شغله يلاقي مراته لابسه اشيك لبس وحاطه برفيوم ومتمكيجه .. وهو مش هاين عليه يحلق دقنه ويلبس كويس فى البيت عشانها

- اللى لو جبتله احسن طباخه فى العالم لازم يقول : " اكيد أكل أُمي احلى "

- اللي يزعق ويشخط ويضرب ويخرب الدنيا .. عشان حد شال الاباجوره من الكومودينو اليمين وداها ع الشمال

- اللي بيقول دايما على مراته " نكدية " او مسميها " الحكومة "

- اللى غالبا " مسقط بنطلونه " او " لابس تي شيرت بيلمع " او " بنطلون اسكين كاروهات " وما شابه ذلك كان انيل واضل :D

-  اللى لازم يكون متابع فريق معين ويشوف كل ماتشاته سواء مصري او لا ..ولو ملوش فى الكورة ( يبقى مصارعه وكان الله فى العون )

- اللي مش عاوز يشوف " مهند " و " كريم " و " اسمر " فى بيته .. بس مطلوب من مراته تبقى " سمر " او " غزل " او انشالله حتى " نور " :D

- اللي بيتفذلك فى كل حاجة .. الكهربا ، الميه ، الاجهزة ، .. " الباشمهندس السيد احمد "

- اللي اول ما يتعلم كومبيوتر ونت .. يفتح " Google " او " Youtube" .. يكتب " Sex "

- اللي بيشتري الحاجة اللى عليها خصم حتى لو ملهاش لازمة .. " لا انا ولا انتى ولا البت بنحب الكورن فليكس .. بس ده عليه اوووفر " :D

- اللي لما ينزل يشتري هدوم يسأل : " الموضه ايه؟ "

- المتدين بطبعة اللى بيصلي  الجمعه بس عشان من الجمعه للجمعه كفارة لما بينهما .. وياحلاوة كمان لو صلي فى رمضان فى المسجد

- اللي بيقرا ده دلوقتي وبيشتمني وبيقول : انا طبعا مش كده .. بص ع الـ 90 % اللى فوق !!!

انت ..

انت ..
انت ضعفي وقوتي ..
انت ابتسامتي ..
انت دمعتي ..

انت الشوق ..
الفرحه اللى بتاخدني ..
وتطير لفوق ..

انت الخيط اللي بيني ..
وبين الدنيا ..
انت اللي بشوف بيك ..
مش عنيا ..

انت اللي ..
باخد قوتي منك ..
روحي بلاقيها ..
وانا جمبك ..
بتنفس .. نفَسَك

انت امبارح ..
انت بكرا ..
انت احلى حاجة فى كل فكرة ..

انت دلوقتي وبعدين ..
انت اللى عيشالك وهيعشلك ..
سنين ...

انت دوا جرحي .. وبُكايا
انت ..
اللى اتمنيتك دايما .. معايا
انت ..
طفولتي وصِبايا

انت .. !

ليه ؟!

الموضوع بدأ بكلمة استفهام .. " ليه " !
متحاولش تلاقيلها اجابه ولا انا هديك هنا اجابه ..
انا زيي زيك .. محتارة وكل يوم اشوف حاجة اتنين تلاته وعشرة يخلونى اسأل .. " ليه " ؟
الناس المتدينه شوية .. او اللى ايمانها قوي - ربنا يجعلنا منهم - بيقولولى دايما : متسأليش ليه ؟ فى حاجات كده .. ربنا عاوزها كده لحكمة عنده .. !
** كلام معقول برضو ..

والناس اللى بتتفلسف .. بتقول : كل حاجة وليها سبب وممكن تلاقي السبب جاي من سبب تانى وهكذا لحد ما يخلوك تشد فى شعرك وتلعن الساعه اللى سألت فيها
** ومالو !

الناس بقى اللى مكبراها خالص بتقول : اديها ميه تديكي تراوه .. ونفض وهيس تعيش كويس وانسى هموم الدنيا يا صاحبي ايدي فى جيبي وماشي براحتى ..
** نظرية بتنفع احيانا .. تشكروا :D

فى بقى الناس المتربه احم .. قصدي الاجيال القديمه دي اللى يقولولك : اسأل الى اكبر منك وخد خبره منه ومتتصرفش من نفسك وتاخد المحاضره التمام اللى توجعك اكتر من حقنة التطعيم بتاعت اباتدائي اللى كانت بتخلى الممرضة تجري وراك الفصل كله .. !
** شكرا لحسن تعاونكم معانا ..

الناس اللى مؤمنة بنظرية المؤامرة بقى يقولوا : يستحيل ده يكون حصل بمحض الصدفه .. مينفعش اصلا ،، في ايد ورا الكلام ده و " ليه " دي ليها 100 اجابه واجابه ..
** سمعونا تفسيرتكوا الفـ***ة !

قصاد كل " ليه " بتقولها مليون حاجة تخليك متبطلش تقولها ..
و كل اجابه لـ " ليه " دي بتسمعها .. لازم تقول بعدها : طب ليه ؟
الموضوع مش واقف عندي وعندك .. كله بيقول ليه ؟؟

يمكن ليه دي سبب وجودنا اصلا ؟
لازم ندور ونعرف ليه .. ونعيش ونكمل ويطلع عين اللى جابونا كمان ..

ومقتنعه جدا بأن في ناس بتعيش وتموت وهى بتقول ليه .. او تموت ويجوا اللى بعدها يقولوا .. ليه !

لو عرفت ليه بقى ابقى اكتب هنا فى الكومنت :D

مصر بتتحَرَق

عُرس الديموقراطيه كلاكيت تانى مره .... آاااكشن !
--------------------------------------------
عُرس ايه وديموقراطيه ايه بقى ارحموا امي العيانه !
هي مش الديمقراطيه دي اتزفت من كام شهر كده وكانت خلفتها لوز وجابتلنا " مجلس الشعب الاخوانجي السلفي " الموقر ؟!
وبصراحه يا حبذا لو بطلت خِلفه خالص .. هتريح وتستريح !

أد ايه انا فخورة اني مصرية .. واني من الشعب العظيم ده ..

شعب مصر اللى فيه كتير منه لسه ..
 بيقولوا : " فين ايامك يا مبارك "
واللى بيقولوا " البلد دي عاوزة واحد عسكري "
واللى بيقولوا " الاخوان دول بتوع ربنا " !!
واللي بيقولوا " الهوجة اللى حصلت دي " - اللى هي احنا بنقول عليها ثورة تقريبا يعنى - :D

شعب مصر اللى في كتير منه جري ينتخب " شفيق " عشان رجل عسكري ..
وعشان عمل المطار !!
شعب مصر اللى كتير منه انتخب " موسى " عشان راجل سياسي ع قديموووو !!!
شعبي حبيبي اللى فخورة بيه اللى فيه ناس بتنتخب " مرسي " عشان من الاخوان .. اللى هما كانوا من كام سطر كده " بتوع ربنا " !!
شعبي حبيبي اللى فيه كتير منه انتخبوا " صباحي " عشان  " واحد مننا "


واخيراً أُقدم إليكم بعض تعليقات بخصوص الانتخابات من بعض الاشخاص المقربين مني ..

1- حضرتك هتنتخب مين ؟؟؟
* مش عارف .. محتار بين خالد علي وصباحي .. بس بلاش صباحي
- ليه ؟
* اصله عيان وعنده فيروس سي !!!
_____________________________________________________________________
2- انتخبتي مين يا آنسه ؟؟ مرسي ؟؟
* لا
- موسى ؟
* لا
- شفيق ؟
* ايوة بالظبط ...
- ليه حضرتك ؟
* اصله راجل عسكري ..
باعتبار ان اللي ماسك مصر حاليا وقبل كده كان سياحه وفنادق ؟ ( ملطوشه وش ) :D
_____________________________________________________________________
3- حضرتك هتنتخب مين ؟؟
* بعد ابو اسماعيل محتار بين ابو الفتوح او مرسي
- مرسي ؟؟؟؟
- هو حضرتك شوفته فى اي برنامج ؟؟ تعرف ايه هو مشروع النهضة ده اصلا ؟؟؟
* بصي انا محتار لسه .. غالبا ابو الفتوح
* انا عاوز شرع الله اللى هما مش عاوزينه دول ..
- مين دول ؟؟
* ما علينا !

_____________________________________________________________________

4- هتنتخب مين ؟
*عمرو موسى
- ليه؟
* مش عشان و اللي يصلح .. انا شايف انه لا يصلح ابدا .. بس انا مع اي حد الا الاخوان ..
مستحيل نسيب تيار واحد يسيطر على كل حاجة .. رياسه وحكومة ومجلس شعب احنا كده بنعمل حزب وطني جديد ..
- رأيك واحترمه .. شكرا :)

______________________________________________________________________
5- هتنتخب مين ؟
* بصي انا مش مصري .. بس لو ليا صوت كنت اديته لصباحي ..
- ليه ؟
* لانه راجل مناضل ومحترم اوى وتاريخه يشرف ..
- شكرا :)

______________________________________________________________________

6- هتنتخب مين ؟
* بعد عمر سليمان مش عارف .. غالبا شفيق يمكن !
- ليه ؟
* انا شغلي فى السياحه ومش عاوز رئيس اخوانجي يخرب بيتي ويقولي السياحه حرام !!
______________________________________________________________________

7 - هتنتخبي مين ؟
* الدكتور ممد مرسي طبعا
- حضرتك اخوانجيه؟
* ايوة
- تقدري تكلميني عن مشروع النهضة ؟
* دول بتوع ربنا الاخوان اللى انتوا خايفين منهم دول .. دول هيطبقوا شرع الله وهيقطعوا ايد اللى هيسرق !
- حضرتك انا لا خايفه ولا حاجة .. بس بما انك اخوان .. احب استفيد منك واعرف اكتر عن مشروع النهضة عشان انتخب الدكتور
* الاخوان بيعملوا خير كتير وبياخدوا المشغولات اللى بتعملها الستات ويحطوها فى معارض خيريه للأرامل والمطلقات واليتامي ..

- يا ستي ربنا يكرمهم .. بس انا مش مطلقه ولا أرمله ولا يتيمه الحمد لله ... وضعي ايه بقى فى البلد ؟ :D

______________________________________________________________________

وفى النهاية .. دي مش فذلكه مني ولا سخريه من حد
كل واحد وله رأيه وانا احترمه ..
بس انا بصراحه ..
حزينة ع البلد و ع شعبها !!!!