صديقة عمري ..

الاول .. كنت بسمع المصطلح ده من بابي وانا صغيره وهو بيقول على صاحبه " صديق عمري " .. كنت بستغرب اوى ، هو بجد فى صداقه بتستمر العمره كله كده ؟؟؟
اللى اكتشفته فى السنين القليله ( اللى بالنسبة لى كتير ) اللى عشتها ... ان انا استغربت لما بابي قال كده .. لان اغلب علاقات الصداقه دلوقتي سيطرت عليها .. " المصلحه "
الناس اللى بتحبني من غير مصلحه .. فعلا قليلين ..
اما عن صديقة عمري .. فكانت معايا من KG 1 فى المدرسه .. لحد ما اتفرقنا عشان كل واحده فينا راحت حته .. ومبقيناش نسأل على بعض لأن كل واحد عرف صحاب جداد !!!!
زعلت اوى .. وافتكرت ان هي خلاص مبقتش بتحبني بس على رأي اللى قال " الدنيا تلاهي " !!
اجمل حاجة بقى .. ان ممكن يبقى عندك صديق تعرفه من شهور بس .. وتكتشف اد ايه هو بيحبك وبيخاف عليك
وهو ده بجد اللى بيستحق لقب " صديق عمري " ..
وانا لاقيت الصديقه دي .. وبجد فرحتي بيها متتوصفش ... وتستاهل ان انا احبها من كل قلبي ..
رقيه .. بحبك يا بت ع المدونة اهه ادام الناس :P:D

For My best friend : Roqaia ElSharkawy 

الحب .. في فصل الشتاء

بالنسبة لى سنة اولى حب بتبقى 4 فصول .. تبدأ بالربيع ، يعنى مشاعر ملهاش حدود وشوق ولهفة ميتوصفوش ، وكلام اجمل منه مفيش ، ويجي بعده الخريف .. شوية الخناقات الحلوة اللى بتبقى فى الاول دي ، وبعدين الصيف وحر وزيادة مشاكل .. لحد ما نوصل لفصل شتاء حب .. يعنى ( برود الحب ) ..
العلاقات بأنواعها التلاته ( صحوبيه - خطوبه - جواز ) .. مفيش علاقة فيهم الا وبنسبة كبيره اوى بداية نهايتها بتكون فصل شتاء حب .. يمكن مثلا مشاعرنا عامله زي الطبخة الحلوة اللى لما بتبرد خلاص مبيبقاش ليها طعم ؟؟
او يمكن مشاعرنا عبارة عن مخزون لما نستهلك منه كتير اوى فى فصل واحد ، لازم يخصل .. او حتى لو اتبقى منه حاجة مش هيبقى كتير !!
بس انا برجح الاحتمال التانى .. ليه بقى ؟!
لأن فعلا فى بداية الحب بنستهلك مشاعرنا زيادة عن اللزوم مثلا : طول اليوم على الموبايل ، ولو مينفعش فى نت ( فيس بوك وتويتر وياهو .. إلخ ) فبالتالى ، احنا حتى مش بنشتاق لبعض ..
يعنى لو ضربنا مثل كده :
لو كل يوم بتاكل لحمه وفراخ وحمام وسمك اكيد هيجي يوم وتزهق رغم انك ممكن تكون بتحبهم كلهم ( طفس زي حالاتى)
هيجي يوم نفسك تروح للفول .. او العدس او الطعميه ... إلخ ، حتى عشان توحشك الاكلات اللى انتا بتحبها دي .. !!
بالظبط هو ده ، بعد فترة من المشاعر الحارة الجياشه .. تلاقي نفسك زهقت .. نفسك تقول/ي ( وحشتني ) وانتا حاسسها لدرجة انك بتفكر تبعد بس .. عشان توصل للأحساس ده ..
طب هتحسها ازاى اصلا .. وانتوا 24 ساعه فى الـ 24 ساعه مع بعض
فصل الشتاء فى الحب بيجي دايما بدري اوي فى العلاقتا اللى بيسموها .. ( صحوبيه )
وبيجي كمان لو فترة الخطوبة طولت .. اوى .. واكيد بعد الجواز .... ( ده فى احيان كتير .. مش دايما طبعا )
مشكلة سنة اولى حب دي ان الفصل فيها مش 4 فصول زي السنة العاديه .. لا خالص .. العمليه بتبقى تيك اواى اكتر من كده فى احيان كتير ..!
بس انا عن نفسي بتمنى اعيش سنة اولى حب دي ... زمان .. يعنى يبصلي ( من تحت الشباك ) .. او مثلا يستنى ( انزل اجيب حاجه ) عشان يشوفني .. او يبعتلى ( جواب ) ومردش عليه
عشان اما ابقى ليه ومعاه العمر كله ( جواز ) .. احس ان مشاعري لسه مستهلكتش منها الا حاجات بسيطة ، ولسه جوايا اللى أديه ، واللى يخلينا انا وهو نعيش احلى مشاعر ... متخلصش !!

يا مُشير ..

انا مش شاعرة .. بس قررت اكتب قصيده فى المُشير طنطاوي .. ليه لا :D


يا مُشير بتشاور على مين
احنا الشعب المظلومين
احنا الاجندات والمندسين
احنا اللى بالمدرعات متداسين
احنا اللى سنين على قفانا واخدين
.............................
يا مُشير بتشاور علي مين
احنا اللى على الوثيقه مش موافقين
احنا اللى مع علاء واقفين
احنا العمال المُضربين
احنا الشهدا .. مسلمين ومسيحيين
............................
يا مُشير بتشاور على مين
احنا اللى كنا فى التحرير معتصمين
احنا اللى من بره .. متمولين
احنا اللى كنا كل يوم من كنتاكي .. واكلين
احنا حزب " لأ " المعترضين
..............................
يا مُشير بتتشاور مع مين
مع عنان والحلوين .. الى حواليك ملمومين
ولا مع حبايبنا اللى فى طره متظبطين
ولا مع سيدك .. اللى عملك زي البني آدمين
ولا مع الاحزاب اللي شاربين ...
شاي بالياسمين ..!!؟
................................
يا مُشير من بدلة لجزمة محتارين
ولا ليك وليها لزمة .. احنا اسفين
وجودك بقى عامل ازمة .. وادينا للتحرير راجعين
 منتا واللى زيك ولا بالدنيا حاسين
ولو فضلنا كده ساكتين ..
يبقى عليه العوض فى المصريين ..!!

عزيزتي الدنيا ..

عزيزتي الدنيا ،
احب اقولك انى رفعت المنديل الابيض وقولت " Loser Loser " مش مشكله ..
بعد ما لعبتي معايا كل اللعب الممكنه وحاولت كتير اغلبك .. برضو مفيش فايده
Game Over
الله يخرب بيتك امتحاناتك اصعب من امتحانات الثانوية العامه .. والدكر اللى ينجح فيها !!!
اول ما ابتديت افهمك ( شوية ) .. حسيتك زي الملاهى .. ممكن كل يوم ألعب لعبه عشان يجيبولى اللى نفسي فيه ..!
بس بعدها بشوية حسيتك عامله زي المسرح .. كل واحد بيمثل دور معين .. ويا ويلي لو كنت فى الكواليس وشوفت حقيقته ..!!
شوية كمان ..
حستك زي معمل الكيميا .. كل يوم تجربه ويا صابت يا خابت ، اللى تجربته بتنجح بتنوري ادامه ، واللى بتقرري تفرقعي فى وشه .. عليه العوض بقى !!
فيكي اللى يحرق واللى يطفي .. واللى يكوي واللى يشفي .. غريبه ؟!
شويتين كمان ..
حسيتك عامله زي ماتش الكورة .. كل اللعيبه عاوزه تعمل اي حاجة عشان تجيب جووول .. حتى لو هيضربوا بعض بقى .. مش فارقه
ده حتى الجماهير بيبقى عندها استعداد تموت بعض
او يمكن تكوني أغنية ..
اغنية حلوة ترقّص .. او حزينه تخليك تدمع .. او وطنيه تملا القلب حماسه .. او رومانسيه كلها مشاعر .. او فيها هجر وفراق وجرح ..!!
ممكن تكوني سلسلة كتب .. بيكملوا بعض
او بنت جميله كل الرجاله بتجري وراها .. اللى يتمنى يشوفها كل يوم .. اللى يتمنى يتكلم معاها بس كلمة .. اللى يتمنى تكون حبيبته .. واللى يتمني تكون مراته وتعيش معاه العمر كله
او شاب وسيم كل البنات هتموت عليه .. !؟
او مثلا
شخص مهم كل الناس تتمني توصله .. او بس تسلم عليه
يمكن تكوني عامله زي شريط النيجاتيف .. مش اى حد يعرف يميز الصور اللى فيه
صور ....
ليه متكونيش صورة .. كل واحد شايفها بيفهمها بشكل معين ..
زي واحد تخين اللى يشوفه يقول عليه طفس وهو اصلا .... " مريض " !!
او واحده صغيره وشايله طفل اللى يشوفها يقول عليها ساقطه ... "وهى اتعرضت للاغتصاب " ..!!
انتى مين فيهم ؟

انا مش عارفه .. بس حتى لو انتى قولتى انتى مين فيهم وعرفتك ..
برضو خلاص
Game Over 

عيدكم طنطاوي !

عيد سعيد عليكوا الاول قبل اى حاجة
عيد سعيد على كل المصريين غصب عن عين العسكر اللى عاوزين ينكدوا علينا ويعيشونا فى هم !!
تييييييييييت .. ( كفاية أدب ) !!!

عيد مهب على دماغكوا يا عسكر واحد واحد ..
مهو لما تبقوا سايبين امثال توفيق عكاشه .. يبقى عيد مهبب عليكوا
لما علاء عبد الفتاح يقضي العيد بعيد عن مراته واهله .. يبقى عيد مهبب عليكوا
لما اهالى الشهدا فى العيد يعيطوا ويتقهروا .. ومبارك متظبط .. يبقى عيد مهبب عليكوا !!!
لما احمد سبايدر يشتم ويخوض فى اعراض الناس .. يبقى عيد وسخ ع دماغكوا .. !!

نأسف لوصلة قلة الأدب دي .. بس اللى يشوف احمد سبايدر وتوفيق عكاشه واهالى الشهداء وتدوينة علاء من جوة السجن .. دمه يغلى ويقول اكتر من كده ..!!

كنت فاكرة ان خلاص بعد 25 يناير .. مفيش عيد ( مبارك تانى ) .. ومفيش (مبارك ) عليكم طول العمر
هو فعلا مفيش
بس بقى فى ... ( طنطاوي ) ..
العيد السنة دي مختلف عن اي سنة
السنة دي مثلا .. نفسي اضحي بحاجة افرح بيها مصر كلها .. ( هو لو هنتكلم ع الفرحه فا مصر محتاجة رووس كتير اوى عشان تفرح )
نفسي ..
نشارك الحجاج فى الرجم .. ونرجم احنا هنا برضو :D ( مبارك .. طنطاوي .. احمد عز .. اللى انتوا عاوزينه يا رجاله )

العيد السنة دي .. رائع
22 ألف بيقضوه فى السجون العسكرية ..

بس عندي امل ان 18 نوفمبر يحصل فيه حاجة بجد .. عندي امل فى 25 يناير من تانى ..
قولت الكلمتين اللى فى قلبي وصدعتكوا كالعاده ..

كل سنة وانتوا طيبين .. ويارب يكون العيد اللي بجد .. مع قيام الثورة ..!!!

عصام ( شرف ) ..!!

من غير مقدمات ..
اصلها بقت حاجة مهببه اوي يعنى ..!!!

انجازات عصام شرف ( اكبر مقلب خدته الثورة ) من كترها بتوه ومش بعرف اقولها لحد..

1- لغى التوقيت الصيفي .. تعبناك يا ريس معانا والله ,, تُشكر !!

ده غير :  2- ارقام الموبايلات اللي زادت رقم.. اه يا شعب مش عاجبه حاجة .. جتكوا نيله
الراجل ريحكوا بدل ما تقعد تتوه مين 016 ومين 0152 ومين ومين ... دايما كده تنكروا الجميل ؟؟؟؟

طب بلاش ..  3 - غيرلكوا ترددات القنوات .. اهه عداه العيب وأزح كمان !!
يعنى تيجي تتفرج ع نور ومهند ع قناة ( البيت بيتك ) أو ميرنا وخليل على ( النهار ) أو العشق الممنوع على ( Cbc ) - يخرب بيت ابو المسلسلات التركي - والشاشه تبقى مش حلوة ومتشوفش كويس ؟؟؟ ودي تيجي ؟؟

مش كده وبس
الماتشات كمان .. يعنى ننيم ( أم الشعب ) ونلهيه عن بلاوي العسكر والحكومة أزاى لو القنوات مش مظبوطة يعنى ؟؟؟
بلاش دي ..
افلام العيد .. نشوف اعلاناتها ازاى طيب ؟؟

كل ده كلام فاضي .. تغير قنوات .. تغيير موبايلات .. ياخوفي من التغيير اللى جاي بصراحه :D
اهم انجازات عصام ( شرف ) على الاطلاق " خلوا بالكوا من القوسين دول " :D

4- هو عدم هبوط الانديه للدرجة التانيه .. يخليك انتا يارافع من روحهم المعدنيه !!!

طبعا واخدين بالكوا ان كل مشاكل الشعب انتهت خلاص .. ومش فاضل غير " الدوري ومشاكله " ... !!!

اما بقى .. فى الآونه الاخيره سمعت إشاعة من ( طلعت السادات ) .. مش عارفه صح ولا لا ?
بس وحياة الست والدتي لو طلعت صح .. يبقى الشعب االمصري اتقرطس صح اوووووى .. والثوار بالذات يعنى

عصام ( شرف ) هو وأولاده .. معاهم الجنسيه ( الامريكيه ) .. تن تن تااااااااااااا
يلاهويز ..؟!
ايوة ليه لا يعنى .. والله ما استبعدها .. أشك ان الاشاعه دي تكون غلط .. " امال هو طري كده من شوية " ..
مبيتكشفش ع الشعب " إلا فى المصايب " .. مينفعش اقول فى الــ " مناسبات " لا مؤاخذه :D

ولا أجد لي عزاءً .. إلا في .. (توفيق عكاشة) أكتر حاجة مسليه على الشاشه والله ياراجل .. !!
و( احمد سابيدر ) العاهه ده .. !!

لكي الله يا مصر .. ومازالت بقول " الثورة لم تقم بعد " 

وانقسم الشعب ..!!

العنوان يخض صح ؟؟
ويمكن اللى بيقرا دلوقتي يقولي .. لااااااااا احنا طول عمرنا أيد واحده :D:D
عزيزي القارئ  .. لو ناوي تكمل البتنجانه دي سمعنا سكاتك و ورينا اخلاق القارئ المؤدب
ربع ايدك واسمع :D ..و أجل الهتافات دي لحد ماتخلص قرايه بس

اه انقسمنا .. يعنى انا كان عندي أمل ان الثورة فعلا تخلينا واحد
زمان .. كان بابايا بيحكيلي انهم ماكانوش يعرفوا يفرقوا المسلم من المسيحي غير يوم العيد ..!!
ده رايح جامع وده رايح كنيسه ..
كله كان اخلاق واحده .. روح حلوة .. معامله طيبه .. كانت حاجة تفرح
زمان .. كانوا بيروحوا فى نهاية الاسبوع حفل السيده ام كلثوم او يسمعوها ع الراديو ..
زمان .. كان حتى تشجيع فريقك المفضل .. بأسلوب مهذب
انما دلوقتي اختلف الحال تمامااااااااا ..!!
انقسمنا يجي 90 مليون انقسام على الرغم من اننا كلنا ع بعض 85 مليون :D:D
يعنى مثلا :
اكتر انقسام محزنني انا شخصيا .. انقسام المسلمين والمسيحين بسبب الافراد المتطرفين من الجانبين
وممكن اقسم باقي الانقسامات .. من الاهيف للأتفه .. ازاى بقى معرفش :D
يعنى الكارثه اللى اسمها " اهلى وزمالك " اللى منغصه حياة تلت تربع الشعب دي مثلا .. انقسام تافه .. كده ولا مش كده .. ؟؟ اكيد كده :D
كونك اهلاوي ده شئ طبيعي مفيهوش مشكله .. دي الفطره اصلا :D:D
انما كونك زملكاوي .. ده فى حد ذاته مشكله :P >> وبتعرضك لبلاوي .. آه اسألنى انا اهلاويه رخمه ..:P
اللى فات ده كان هزار ..
ع فكرة اهلاوي او زملكاوي .. مش مشكله ..
المشكله فى اللى بيعتبر النادي اللى بيشجعه هو امه وابوه وممكن يعتبره اغلى من " الموزة بتاعته " لو الامر حكم :D .. ويا ويله يا سواد ليله اللى يغلط فى النادي بتاعي .. ( وخاصة لو زملكاوي ) محدش يزعل :)
اما عن الانقسام الاكتر تفاهه على الاطلاق .. ( انتا عمرواي ولا تيموري ) ؟؟
ممكن اقول كلمة عيب ؟! :D:D
آل عمرو وتامر آل .. واحد يقولك انا عايش ومش عايش ومش محدد موقفه اصلا .. والتانى يقول ببقى نفسي أه . . أه .. :D:D
واحد نزل الميدان اتضرب .. والتانى خد طيارة وخلع .. أظن نعقل شوية بقى ؟!

نيجي بقى لإنقسامات ما بعد الثورة .. ودي الانقسامات الكوميديه على الاطلاق :D
انتا ماسوني .. علمانى .. ليبرالي .. سلفي .. اخوانجي .. انتا كاااااااااافر .. !!
بعد ما طلعنا كل شباب الثورة ماسونيين بناء ع الاسد اللى ع تي شيرت وائل غنيم ( الاسد ده لوجو شركة مش مهم بتاعة ايه اسمها " الامبراطور " كمان ) :D
وخاينين واجندات .. بياكلوا (كنتاكي ) .. " الله يسامحك يا بابي ياريتنى كنت روحت التحرير :D "
ماكتفيناش بكده ..
كمان بقى اي ليبرالى .. سافل .. عديم الادب .. ( ممكن يكون شاذ كمان ) .. وعاوز يكفر الشعب كله !!
اما بقى عن العلمانى .. فا بدون نقاش برضو كافر .. !!

هو لسه في حد مسلم او مسيحي او له مله بعد الثورة يا جدعان ؟!!!

ده بالنسبه للفئه اللى مش فاهمه اى مصطلحات سياسيه وبتفتي ..

قبل ما اكمل ( لو انتا سلفى او اخوانجي .. انصحك تاخد حباية الضغط قبل ما تكمل قرايه .. ) :D
عزيزي السلفي / الاخوانجي
لو هتطلعني كافرة احب اقولك " هأأأأأو قبلك كتير عملوها " :D
اما لو هتقرأ بهدوء احب اقولك .. اختلاف الرز لا يفسد للوز صنيه :)
السلفيين والاخوان ( بدون تعميم ) نسبه كبيره منهم يعنى .. خلوا نص الشعب كافر
يعنى مثلا .. صديق ليا عامل شير لصفحة " كلنا مينا دانيال " .. اتقاله ايه ده .. انتا مش مسلم يعنى ولا ايه ؟؟؟
وهو يعنى مينا دانيال ده كافر مثلا ؟؟؟ ملوش مله ؟؟؟
ع رأي هيثم دبور " موسى نبي وعيسي نبي وكل من له نبي يصلى عليه :D:D "

كل يوم شيخ يطلع بفتوى .. والفتوى تكبر تتحور توصل الى ميعملش بيها انه كافر .. ولا الاجمد بقى ان الدين دخل فى السياسه عشان المصالح الشخصيه ..
بالنهار اشوف الشيخ بالجلابيه بيقول درس .. وبالليل بالبدله مرشح للرياسه ..وعجبي !!

او مثلا .. بعد قرار الاخوان بأن محدش منهم يرشح نفسه للرياسه .. نلاقي واحد منهم قرر يترشح
وهما بيحاولوا يفصلوله فتوى .!!!!
سيدي الفاضل ( اخوانجي / سلفى ) .. احنا بنعرف نقرأ قرآن .. وسُنة .. وعارفين شريعه كمان الحمد لله .. وان كان لحمكوا مسموم زي ما بيقولوا .. يبقى المفروض اكون ميته من بدري :D

فى 25 يناير .. ( الثورة اللى كنت ضدها دي .. ايوة انا :D ) .. من اجمل المشاهد فيها ان مكنش في انقسام .. كان في بس " شباب مصري "
مش مهم اسم ولا دين ولا لون ولا اى انتماء سياسي
انتا نازل عشان مصر .. عشان انتا مصري .. ( وايا كان بقى ايه اللى بيندرج تحت كلمة مصري دي )

طولت انا عارفه ( اصلا انا رغاية ) ..
بتمنى اوى اشوف 25 يناير كلاكيت تانى مره ( بس من غير خسائر فى الارواح )
بتمنى اوى اصحى .. على مصر من غير حكم عسكري ..!!

عاوزين كلنا نبقى ايد واحده بجد .. وميبقاش هتاف نقوله فى المظاهرات وخلاص
اقول قولى هذا .. ومستعده لأى نقد :D

طنطاوي رئيسا للجمهورية

طنطاوي .. من اجلك انت ..!!
مش هستغرب لو ده حصل على فكرة .. يعنى على اعتبار ان احنا 30 سنة بناخد على قفانا فا مش مشكله كمان كام سنة كده ..
بس المشكله فى حاجة دلوقتي >>>
قبل الثورة : جمال كان بيصحى كل يوم على كوباية اللبن من ايد ماما سوزي وعلى وجهها ابتسامه عريضه وهى تناديه " حبيب ماما الرئيس اللى جاي " .. فا اقتنع انه لازم يمسك مصر حتى ولو شوية يعنى :D
بعد الثورة : فا سامي عنان ممكن يموت بالجلطه .. او السكته القلبيه .. إذا طنطاوي بقى رئيس وده يرجع لنفس العِرق بتاع جمال " امسك مصر ولو شويه "

ع اعتبار ان مصر دي مسدس ميه مثلا ..!؟
عزيزي منك له له له .. مصر مسدس خرز واهو عماله يضرب فى عين كل واحد شوية ويخزقهاله :D:D

المهم .. طنطاوي رئيسا للجمهورية ..
معنى كده .. ان احنا هنلغى المحاكمات المدنيه وكما قال احد المغردون فى تويتر " 2015 المسجونين هيكونوا فى السجون العسكريه بيتعاملوا معامله لوز "
مش كده وبس ..
البنات كمان ممكن يبقالهم تجنيد .. اه ليه لا .. " يا حلااااااوة " :D:D
طنطاوي من اجلك انت .. يعنى هيرضي الناس كلها
تقولى ازاى .. اقولك ؟
عاوزين تحاكموا مبارك .. حاكمناه يا ولاد الحلال .. وبالنسبه للأخوة بتوع " أنا اسف يا ريس " مش ناسيكو يا رجاله ومظبطهولكوا فى المستشفي وممكن اهربهولكوا لو حابين ..!!

عاوزين ايه تانى الراجل مراضي الناس كلها اهه ..؟!
كمان طنطاوي ديمقراطي جدا .. تقولى ازاى .. اقولك ؟
يعنى من حق الشعب يتظاهر .. ومن حق العسكر يموتوه :D
من حق الشعب يقول اللى هو عاوزة " استفتاء " .. ومن حق العسكر يرموه فى الزباله ويعملوا اعلان دستوري ..
من حق المحاميين يهتفوا .. ومن حق العسكر يوافقوا ع قوانين القضاه ويحلقوا للمحامين ولا اجدعها حلاق !!!

3atchy ya Gma3a whynot !!

طنطاوي رئيس للجمهورية .. يعنى الشعب هيتظبط ومش هيتحرم من اي حاجة
تقولى ازاى .. برضو اقولك :D

يعنى طول الاسبوع ببدله عسكري .. وخميس وجمعه مدني " مش حارمكوا من حاجة اهه "
يعنى كل جمعه انزلوا التحرير .. واحنا ننفضلكوا  " هو يعنى كل مره مطالبكوا تتحقق .. كده تحسوا بالملل يا شباب الثورة لازم يكون فيها إثارة "

بذمتكوا بعد كل ده .. مش عاوزينه رئيس .. اه يا شعب غدار ( كما قال السعوديين ) مش بيحترم الأب ( كما قال الفنانين ) ولا كبار السن الشرفاء ( كما قالوا جماعه انا اسف يا ريس ) قليل الاصل ( كما قال الاخوة الكوايته )

اقول قولى هذا .. واخش احضر شنطتي عشان هحتاج هدوم فى السجن العسكري :D

احنا ولا العسكر

بعد مرور 9 شهور على ثورة ( 25 يناير ) ..
اصبح شعاري .. يا ثورة ما تمت .. خدها مبارك ورقد !!
مبارك عملها ورقد فعلا .. يعني لبسنا فى العسكر .. وقاعد هو فى التكييف وفى ايده الريموت وحياته عنب !!
وبيقولوا عنده فيروس في المخ .. وبدورله اهه ع حد يعملى " سوفت وير جديد " او " انتي فيرس " وامرنا لله
السؤال اللي بيراودني دلوقتي .. هو طنطاوي بعد ما بقى اشبه برئيس الجمهورية واتحلف ادامه اليمين
هيقبل يحلف اليمين ادام حد ؟؟
هيقبل المجلس العسكري بكل من فيه .. بعد ما كان حاكم .. يبقى محكوم؟؟؟
المشكله إن كانت فى العسكر بنسبه 100 % فا هي فى الشعب بنسبة 1000 %
يعنى اللى يقولك مثلا .. " يعنى كمان نمشيلكوا الجيش ؟؟ نجيبلكوا مين يعنى "
او .. تعليق ظريف قريته ع تويتر " لو العسكر قالولى ابوك حرامي .. هصدقهم "

عوضي على الله فى المصريين يا ناس ..!!!
ومازال عندي امل .. فى مصر من غير " عسكر " !

وعملت مدونة

مش عارفه ايه اللى خلاني اعمل مدونة .. يمكن على رأي بابي مثلا نفسي اتحبس ..!؟ آه ليه لا
الاهم من كده
انى قررت افجر طاقاتي الابداعيه الرهيبه هنا ..
مثلا : الطاقة الفظيعه اللى جوايا بسبب الثانوية العامه وبلاويها .. وكرهي للتعليم المصري
او .. الطاقه اللى جوايا بسبب العسكر وعمايلهم ..
او .. اكبر طاقه جوايا بأني نفسي افجر واحد سلفي او اخوانجي .. ولو وهابي مفيش مانع :D
المشكله بقى انى كنت كائن هلامي بلا هدف قبل الثورة .. بمعنى
انى كنت منفضه ومعرفش اي حاجة فى اي حاجة .. لا والاجمد انى ساعة الثورة كنت بشوف القناة الاولى :D:D
فا قررت اقتحم وبقوة .. الفيس بوك والتويتر
ويا اقتحام ما تم ..
لان لو الثانوية العامه بتتاخد من تويتر مكنتش هقعد عليه طول الوقت ده :D
ونتيجة تهوري .. اصبحت " سوكا + نتاشا = سوكاتاشا " كما اصبحت ايضا " برجوازية " :D

اما عن الفيس بوك فا لو قاصده يجيلي شلل .. برضو مكنتش هفتحه كده ..
الفيس بوك اقدر اوصفه بأنه مصغر جنينه الاسماك .. لو شوفت واحده قررت تعرف أمة لا إله إلا الله ان عندها ما يسمي بـ " البوي فريند " .. او متخانقه معاه وعاوزة تكتب " مخنوقة وعاوزة اموت " .. اكيد يبقى انتا فى " الفيس بوك " :D
ولو شوفت واحد قرر يجمع مليون واحد عشان ماما حرماه من أكل البيت .. برضو تبقى فى " الفيس بوك "

واخيرا وبعد المعاناه دي .. بقى .. عندي مدونة :D :D
لو اتحبست متنسوش بقى " كلنا منة " ( ده على الفيس بوك ) و " FreeMenna " (كا هاشتاج على تويتر )

والله الموفق

خالتي اللتاتة

"خالتى اللتاته" مصطلح قاله احمد مكى على ماجد الكدوانى فى فيلم طير انت لأنه كان رغاى ، والحقيقه إن مصر بتعيش أزهى عصور انتشار ظاهرة "خالتى اللتاته" ، البنت من أول ماتعرف تتكلم تقريبا بتبقى "خالتى اللتاته" ، الطالبة فى المدرسة مبتسيبش اى واحده أو واحد الحقيقة يعنى فى حاله حتى المدرسين ( آاااااااه والله ) لازم تعلق ع كل البشر ودي برضو أكيد "خالتى اللتاتة" ، كل واحدة رايحة شغلها من أول ماتشوف الشارع الصبح لحد ماتشوفة تانى بعد الضهر أو بليل مرورا بمرحلة وجودها فى الشغل طبعا وهى مش سايبه حد فى حاله برضو " خالتى اللتاته" ، المصيبة بقى إن حتى بقى فى رجاله ممكن نسميهم "خالتى اللتاته" ، وده ناتج عن طاقة مكبوتة جواه ياحبة عيني من مراته فى البيت "خالتى اللتاته" ، أو نتيجة البيت قبل ما يتجوز اى أن ماما كانت "خالتى اللتاته" ، ملحوظة : ده معناه إن "خالتى اللتاتة" بتربي اجيااااااال ، أحيانا بقول أنى ساعات بكون "خالتى اللتاته" ، آه ، ممكن ، ليه لا ، يمكن يكون نتيجة فراغ أحيانا ، أو حشرية فى بعض الأوقات ، أو كبت دايما ، إنما بالشكل اللي بنشوفه دلوقتى ده لا صعب ، صعب أوى كمان ،  نرجع من تانى لموضوعنا يعنى إيه "خالتى اللتاته" ؟؟ هي/هو كائن حشري ، حاطط مناخيره فى اى وكل حاجة ، كائن دايس فى اى حاجة واى حوار طب ليه ؟؟ طبعا عشان يلت ويعجن ( اى حكاية فى اى رغيف ) ، "خالتى اللتاته" هي/هو كائن بيحب يجيب الجديد ، وينم ع امة لا اله إلا الله ، لا وإيه أتحداك لو فى "خالتى اللتاته" معندهاش كل الجديد دايما ، "خالتى اللتاته" هي ظاهرة أو ممكن تكون واقع مرير إحنا عايشينه للأسف ، وباااااء والمصل لسه منزلش ، اللي نقدر نقوله إنها مشكله ، وجارى البحث عن حل ليها ، ونتمنى انقراضها فى اقرب وقت .لأن صعب نكون 80 مليون "خالتى اللتاته" !!!!!