عارفه .. ؟

عارفه .. ؟
كان ممكن لو زعلتك .. تعاتبيني
كان ممكن بذوقك .. تحرجيني
بكلامك الحلو اللى عودتيني عليه ..
تغلبيني ..

عارفه ..؟
مستغربه ان انتي .. اللي تزعليني
وابقى زيي زي كل الناس .. تعامليني

عارفه ..؟
انا اسفه مش هينفع اقولك استنيني ..
الانتقام مش عاده فيا .. بس
انتي علمتيني ..

مسيبش حقي .. لو على رقبتي
حتى لو اللى مزعلني .. هو انتي
و اللي يزعلني .. لازم
احسسه بقيمتي ..

عارفه .. ؟
من زعلي خايفه عليكي مني ..
عشان دايما
بخاف عليكي لأني ..
في جنوني بخاف ازعلك .. ابعدك عني

عارفه .. ؟
فايتك كتير فيا ..
ازاي فاهمه انك فهماني
كأنك دلوقتي بتتعرفي عليا ..
وانا اللى كنت فكراكي نصي التاني !

مصري اصيل

 المصري الاصيل هو .. 
( الكلام مفيهوش تعميم اوى نقدر نقول 90 % منهم كده )

- اللى عاوز مراته تلبس واسع ومحترم وطرحه كبيره ويبص فى التليفزيون على هيفا ونانسي ويقولها بكل براءه : " شايفه .. شايفة الستات اللى بجد " !

-اللى عاوز يعرف بنت واتنين وتلاته وعشره - كل البنات بتحبك كل البنات حلوين - واما يتجوز يقول بنفس البراءة " متجوزش واحده مشيت معاها " !

- اللي عاوز يرجع من شغله يلاقي مراته لابسه اشيك لبس وحاطه برفيوم ومتمكيجه .. وهو مش هاين عليه يحلق دقنه ويلبس كويس فى البيت عشانها

- اللى لو جبتله احسن طباخه فى العالم لازم يقول : " اكيد أكل أُمي احلى "

- اللي يزعق ويشخط ويضرب ويخرب الدنيا .. عشان حد شال الاباجوره من الكومودينو اليمين وداها ع الشمال

- اللي بيقول دايما على مراته " نكدية " او مسميها " الحكومة "

- اللى غالبا " مسقط بنطلونه " او " لابس تي شيرت بيلمع " او " بنطلون اسكين كاروهات " وما شابه ذلك كان انيل واضل :D

-  اللى لازم يكون متابع فريق معين ويشوف كل ماتشاته سواء مصري او لا ..ولو ملوش فى الكورة ( يبقى مصارعه وكان الله فى العون )

- اللي مش عاوز يشوف " مهند " و " كريم " و " اسمر " فى بيته .. بس مطلوب من مراته تبقى " سمر " او " غزل " او انشالله حتى " نور " :D

- اللي بيتفذلك فى كل حاجة .. الكهربا ، الميه ، الاجهزة ، .. " الباشمهندس السيد احمد "

- اللي اول ما يتعلم كومبيوتر ونت .. يفتح " Google " او " Youtube" .. يكتب " Sex "

- اللي بيشتري الحاجة اللى عليها خصم حتى لو ملهاش لازمة .. " لا انا ولا انتى ولا البت بنحب الكورن فليكس .. بس ده عليه اوووفر " :D

- اللي لما ينزل يشتري هدوم يسأل : " الموضه ايه؟ "

- المتدين بطبعة اللى بيصلي  الجمعه بس عشان من الجمعه للجمعه كفارة لما بينهما .. وياحلاوة كمان لو صلي فى رمضان فى المسجد

- اللي بيقرا ده دلوقتي وبيشتمني وبيقول : انا طبعا مش كده .. بص ع الـ 90 % اللى فوق !!!

انت ..

انت ..
انت ضعفي وقوتي ..
انت ابتسامتي ..
انت دمعتي ..

انت الشوق ..
الفرحه اللى بتاخدني ..
وتطير لفوق ..

انت الخيط اللي بيني ..
وبين الدنيا ..
انت اللي بشوف بيك ..
مش عنيا ..

انت اللي ..
باخد قوتي منك ..
روحي بلاقيها ..
وانا جمبك ..
بتنفس .. نفَسَك

انت امبارح ..
انت بكرا ..
انت احلى حاجة فى كل فكرة ..

انت دلوقتي وبعدين ..
انت اللى عيشالك وهيعشلك ..
سنين ...

انت دوا جرحي .. وبُكايا
انت ..
اللى اتمنيتك دايما .. معايا
انت ..
طفولتي وصِبايا

انت .. !

ليه ؟!

الموضوع بدأ بكلمة استفهام .. " ليه " !
متحاولش تلاقيلها اجابه ولا انا هديك هنا اجابه ..
انا زيي زيك .. محتارة وكل يوم اشوف حاجة اتنين تلاته وعشرة يخلونى اسأل .. " ليه " ؟
الناس المتدينه شوية .. او اللى ايمانها قوي - ربنا يجعلنا منهم - بيقولولى دايما : متسأليش ليه ؟ فى حاجات كده .. ربنا عاوزها كده لحكمة عنده .. !
** كلام معقول برضو ..

والناس اللى بتتفلسف .. بتقول : كل حاجة وليها سبب وممكن تلاقي السبب جاي من سبب تانى وهكذا لحد ما يخلوك تشد فى شعرك وتلعن الساعه اللى سألت فيها
** ومالو !

الناس بقى اللى مكبراها خالص بتقول : اديها ميه تديكي تراوه .. ونفض وهيس تعيش كويس وانسى هموم الدنيا يا صاحبي ايدي فى جيبي وماشي براحتى ..
** نظرية بتنفع احيانا .. تشكروا :D

فى بقى الناس المتربه احم .. قصدي الاجيال القديمه دي اللى يقولولك : اسأل الى اكبر منك وخد خبره منه ومتتصرفش من نفسك وتاخد المحاضره التمام اللى توجعك اكتر من حقنة التطعيم بتاعت اباتدائي اللى كانت بتخلى الممرضة تجري وراك الفصل كله .. !
** شكرا لحسن تعاونكم معانا ..

الناس اللى مؤمنة بنظرية المؤامرة بقى يقولوا : يستحيل ده يكون حصل بمحض الصدفه .. مينفعش اصلا ،، في ايد ورا الكلام ده و " ليه " دي ليها 100 اجابه واجابه ..
** سمعونا تفسيرتكوا الفـ***ة !

قصاد كل " ليه " بتقولها مليون حاجة تخليك متبطلش تقولها ..
و كل اجابه لـ " ليه " دي بتسمعها .. لازم تقول بعدها : طب ليه ؟
الموضوع مش واقف عندي وعندك .. كله بيقول ليه ؟؟

يمكن ليه دي سبب وجودنا اصلا ؟
لازم ندور ونعرف ليه .. ونعيش ونكمل ويطلع عين اللى جابونا كمان ..

ومقتنعه جدا بأن في ناس بتعيش وتموت وهى بتقول ليه .. او تموت ويجوا اللى بعدها يقولوا .. ليه !

لو عرفت ليه بقى ابقى اكتب هنا فى الكومنت :D

مصر بتتحَرَق

عُرس الديموقراطيه كلاكيت تانى مره .... آاااكشن !
--------------------------------------------
عُرس ايه وديموقراطيه ايه بقى ارحموا امي العيانه !
هي مش الديمقراطيه دي اتزفت من كام شهر كده وكانت خلفتها لوز وجابتلنا " مجلس الشعب الاخوانجي السلفي " الموقر ؟!
وبصراحه يا حبذا لو بطلت خِلفه خالص .. هتريح وتستريح !

أد ايه انا فخورة اني مصرية .. واني من الشعب العظيم ده ..

شعب مصر اللى فيه كتير منه لسه ..
 بيقولوا : " فين ايامك يا مبارك "
واللى بيقولوا " البلد دي عاوزة واحد عسكري "
واللى بيقولوا " الاخوان دول بتوع ربنا " !!
واللي بيقولوا " الهوجة اللى حصلت دي " - اللى هي احنا بنقول عليها ثورة تقريبا يعنى - :D

شعب مصر اللى في كتير منه جري ينتخب " شفيق " عشان رجل عسكري ..
وعشان عمل المطار !!
شعب مصر اللى كتير منه انتخب " موسى " عشان راجل سياسي ع قديموووو !!!
شعبي حبيبي اللى فخورة بيه اللى فيه ناس بتنتخب " مرسي " عشان من الاخوان .. اللى هما كانوا من كام سطر كده " بتوع ربنا " !!
شعبي حبيبي اللى فيه كتير منه انتخبوا " صباحي " عشان  " واحد مننا "


واخيراً أُقدم إليكم بعض تعليقات بخصوص الانتخابات من بعض الاشخاص المقربين مني ..

1- حضرتك هتنتخب مين ؟؟؟
* مش عارف .. محتار بين خالد علي وصباحي .. بس بلاش صباحي
- ليه ؟
* اصله عيان وعنده فيروس سي !!!
_____________________________________________________________________
2- انتخبتي مين يا آنسه ؟؟ مرسي ؟؟
* لا
- موسى ؟
* لا
- شفيق ؟
* ايوة بالظبط ...
- ليه حضرتك ؟
* اصله راجل عسكري ..
باعتبار ان اللي ماسك مصر حاليا وقبل كده كان سياحه وفنادق ؟ ( ملطوشه وش ) :D
_____________________________________________________________________
3- حضرتك هتنتخب مين ؟؟
* بعد ابو اسماعيل محتار بين ابو الفتوح او مرسي
- مرسي ؟؟؟؟
- هو حضرتك شوفته فى اي برنامج ؟؟ تعرف ايه هو مشروع النهضة ده اصلا ؟؟؟
* بصي انا محتار لسه .. غالبا ابو الفتوح
* انا عاوز شرع الله اللى هما مش عاوزينه دول ..
- مين دول ؟؟
* ما علينا !

_____________________________________________________________________

4- هتنتخب مين ؟
*عمرو موسى
- ليه؟
* مش عشان و اللي يصلح .. انا شايف انه لا يصلح ابدا .. بس انا مع اي حد الا الاخوان ..
مستحيل نسيب تيار واحد يسيطر على كل حاجة .. رياسه وحكومة ومجلس شعب احنا كده بنعمل حزب وطني جديد ..
- رأيك واحترمه .. شكرا :)

______________________________________________________________________
5- هتنتخب مين ؟
* بصي انا مش مصري .. بس لو ليا صوت كنت اديته لصباحي ..
- ليه ؟
* لانه راجل مناضل ومحترم اوى وتاريخه يشرف ..
- شكرا :)

______________________________________________________________________

6- هتنتخب مين ؟
* بعد عمر سليمان مش عارف .. غالبا شفيق يمكن !
- ليه ؟
* انا شغلي فى السياحه ومش عاوز رئيس اخوانجي يخرب بيتي ويقولي السياحه حرام !!
______________________________________________________________________

7 - هتنتخبي مين ؟
* الدكتور ممد مرسي طبعا
- حضرتك اخوانجيه؟
* ايوة
- تقدري تكلميني عن مشروع النهضة ؟
* دول بتوع ربنا الاخوان اللى انتوا خايفين منهم دول .. دول هيطبقوا شرع الله وهيقطعوا ايد اللى هيسرق !
- حضرتك انا لا خايفه ولا حاجة .. بس بما انك اخوان .. احب استفيد منك واعرف اكتر عن مشروع النهضة عشان انتخب الدكتور
* الاخوان بيعملوا خير كتير وبياخدوا المشغولات اللى بتعملها الستات ويحطوها فى معارض خيريه للأرامل والمطلقات واليتامي ..

- يا ستي ربنا يكرمهم .. بس انا مش مطلقه ولا أرمله ولا يتيمه الحمد لله ... وضعي ايه بقى فى البلد ؟ :D

______________________________________________________________________

وفى النهاية .. دي مش فذلكه مني ولا سخريه من حد
كل واحد وله رأيه وانا احترمه ..
بس انا بصراحه ..
حزينة ع البلد و ع شعبها !!!!

الأدب فى العصر العباسي ..

يااااه يااااه .. وزارة التربية والتعليم دي عليها شوية جُمَل !!!
مش غريب من وزارة التربيه والتعليم ..
لما تخلى الطالب يدرس 9 دروس ادب الدرس منهم فى متوسط 12 صفحه فيما اكتر .. عن الادب فى 4 عصور ..
منهم العصر العباسي الاول والتاني اللى هو اكتر من 200 سنة بكتير ..
مش ده موضوعنا برضو ..
نقطة ومن اول السطر ..
مش غريب برضو من الوزارة لما تخلى على كده دة درجة واحده .. !!!
لالالا .. تحرق الدم دي تقريبا ؟!
طب ما عادي ماحنا بناخد درسين من المكتبه العربيه ( كتاب الاغاني - وكتاب الذخيره )
وكل كتاب من دول عليه حوالى 10-15 صفحه ده غير مثال منه .. وكل ده عليه برضو .. درجة واحدة !
يعنى اجمالى درجات 11 درس أدب .. درجتين ..!!
عظيم .. عظيم

برضو مش ده موضوعنا
" انا واضح ان الثانوية اضافت لشخصيتي سمتين مهمين .. اللت ،، والرخامه "

المهم ..
الوزارة بقى بنت حلال .. قبل الامتحان بكام شهر بتنزل كتاب هايل ..
اسمه " دليل تقويم الطالب "
وده زيه زي كتاب المدرسه الطالب لازم يحل اسألته عشان بتيجي فى الامتحانات ... ساعات

وفي يوم من ذات الايام قررت احل فيه .. عن العصر العباسي الاول
وكأي عصر .. الطالب المفروض يعرف ملامح الحياة فيه وبعدين سمات الأدب ..

توكلنا على الله ..
ســ(1) : لماذا قسم المؤرخون العصر العباسي إلى عصرين ؟؟
ســ(2) : ما سبب قيام الدوله العباسيه ؟؟

امممممممممم .. الكلام ده كان فى ملزمة الدرس ؟؟؟؟؟؟
وبعد تدوير عميق ... لا

الله يخرب بيتك يا مستر هتضيعنا .. هقوم اجيب كتاب المدرسة ..
وبعد تدوير عميق .. مفيش اجابه فى كتاب المدرسه ...!

بس .. لاقيتها
اكيد فى اجابات الاسئله بتاعت دليل التقويم ..
وبعد ملل من التدوير ... مفيش اجابه ..!!

اكلم المستر اسأله ... ؟
ده مدرس عربي ذنبه ايه طيب ؟

وبعد مُكالمة حوالي ربع ساعة مع مُدرس .. " التاريخ " !
وصلت لإجابه للسؤالين دول

مش غريب انك تلاقي سؤال من " الوزارة " ملوش اجابه عند " الوزارة " ..
الغريب هو انك تفضل بعقلك بعد كل ده !

احنا لينا الجنه من وسع
وقبل كده لنا ........ لنا الله

تصحبكم السلامة ... Go To Hell

نقطة بداية

نقطة بداية ..
احلى حاجة فى اي حاجة بالنسبه لى هي نقطة البدايه ..
رغم ان في ناس كتير اوى بتكره الـ " صفر" ...
بس الصفر هو اللى بيوصلنا للي بعده .. غصب عننا لازم نبدأ منه ..
احلى حاجة فى حياتنا هي الاصفار ..
أول صفر .. لما تبدأ تتهته وتتعلم الكلام وتقول .. " بابا وماما " بالعافيه وتلغبط فى باقي الاسامي
* ولما توصل لقمة الفصاحه واللماضه .. تتمنى السكوت وتتمنى ترجع من تانى طفل مش عارف يتكلم !

تانى صفر .. لما تبدأ تسحف .. وبعدين تمشي و .. تقع !
* ولما تقدر تمشي وتجري وتقف وتقعد .. تفكر قبل الخطوة .. وتتمنى ترجع من تانى طفل بيجري ويلعب من غير تفكير

التالت .. اول يوم مدرسه .. تبقى فرحان اوى باللبس الجديد والقلم اللى شكله حلو والكتب والشنطة .. وتزعل لما بابا / ماما يسيبوك ويروحوا
* ولما تكبر .. تتمنى ترجع تانى زي الاطفال اللى فى K.G دول اللى بيلعبوا من غير ما يفكروا فى اي حاجة ولا شايلين هم حاجة

الرابع .. لما تتفوق فى المدرسه وتجيب درجة حلوة ..  " فاكره انا الفرحه دي والاحساس ده "
*ولما تشوف اللى بيحقدوا عليك .. ومش بيتمنولك الخير .. تتمنى من تانى ترجع للصفر !

الخامس ..اول صاحب فى حياتك .. اد ايه بتبقى فرحان بيه .. وان ليك حد قريب منك تحكيله ويحكيلك
* ولما تبعد عنه او اى ظروف تفرقكوا  .. تزعل زعل الدنيا كلها وتتمنى لو كنت حتى مقابلتهوش .. !

السادس .. اول حب فى حياتك .. اول لمسه .. اول كلمة " بحبك " تقولها .. بتبقى فى عالم تانى وحاسس انك اسعد واحد فى الدنيا دي كلها
*ولما ينتهى النهاية المعتداه اللى اسمها : " مينفعش " بتحس انك انكسرت وتتمنى لو انك مكنتش تعرف يعنى ايه حب من اساسه ..

السابع .. اول مشكله تقابلك فى حياتك وتكون بسيطة ورغم كده تحسها كبيييييره ولما تحلها تحس انك عملت انجاز .. وقدرت تطلع نفسك من اى زعل وتفرح
* ولما المشاكل بتكتر ممكن توصل لأحساس انك مبقاش عندك احساس اصلا .. !!!

واصفار كتير اوى مش ( 7 ) بس ..
وانا شيفاهم احلى اصفار فى حياتي وحياة اي حد ..
دايما احلى حاجة فى كل حاجة نقطة البدايه .. نقطة الصفر !

مذكرات طالب كيمياء

من غير لف ودوران ..
الكيميا دي من اجمل المواد اللى درستها فى حياتي ..
لا ..
Really Really بموت فى امها .. :D:D
مش عارفه ليه ادرس 9 ابواب كل باب يطلعله بتاع 20-30 ورقه ( والكلام ده مش ع العضوية طبعا ) ..
طب ما هما 5 -6 حلوين يعني ..
والمشكله ..
انى سؤاء كنت علمى علوم او علمي رياضه ..
مفتكرش ان تلت تربع الكلام ده هينفعني بنكله لما ابقى ( دكتورة ) او ( مهندسة ) !

ما علينا ..
الكلام ده قالوه كتير قبلي كانت حاجة اتغيرت يعنى .. هأأأأأأأو
فكرت النهاردة ..
هو ليه ثاني اكسيد الكربون لا يشتعل ولا يساعد ع الاشتعال ؟
طب انا نفسي اخليه يشتعل ويساعد ع الاشتعال واخد جايزة نوبل فى كده :D:D
طب بلاش ..
ليه الحديد ميتفاعلش مع حمض النيتريك المركز ومتتكونش طبقة اكسيد ؟
نفسي افاعلهم وميتكونش اكسيد .. وبرضو اخد نوبل فى الموضوع ده :D

بس نوبل بالتعليم ده اخدها ازاي يعنى؟
طب هو احمد زويل خدها ازاى .. بمنهج ( امل وعمر ) ؟
لا بس قالوا عليه انه كان شاطر وبيذاكر برضو :D

- طبعا اي حد اتجنن وفكر يقرأ الكلام ده زمانه بيشتم فيا شتيمه الإبل -
عاتشي جدا يا ( كابتن / طنط ) .. البيتش بيتشك واشتم براحتك حد واخد منها حاجة !
بس يمكن عذري الوحيد فى الهرتله دي انى فى ثانوية
وده يغفرلي اى حاجة  بقى !!!

بس كده كفايه لت ..
بكرا هكمل بقى
19-3-2012

ضحية ثانوية عامه ..

اختلفت الآراء على طالب الثانوية العامه فى مصر ..
مثلاً ..
فى ناس شايفه ان طالب الثانوية العامه خلال السنتين دول لازم يكون آله للمذاكرة والحفظ - والحفظ اكتر طبعاً - 24 ساعه على الحال ده ..
لدرجة ان اللى يشوفه قايم من ع الكتاب 5 دقايق يسأله بكل براءه ... انتا مش بتذاكر ليه؟ :D
وفى ناس تانيه شايفه انها حاجة عاديه اوي .. وابني حبيبي - حبيب مامي - يتدلع زي ما هو عاوز وانا هدخله الجامعه اللى يشاور عليها .. !
وفى ناس تالته - زي حالاتنا كده - شايفنها سنة زيها زي اي سنة .. الفرق بس ان دي اللى بتحدد مستقبل الانسان ...
طب مهو سنة زي اي سنة دي فعلا كلمة صح ..
اصل المناهج ... زباله زي كل سنه ..
التدريس .. لسه بنفس الاسلوب المترب ..
المدارس .. مازال النظام فيها قاتل للابداع والابتكار واي حاجة نضيفه !
يبقى فعلا سنة زي اي سنة ..
اما موضوه بتحدد مستقبل الانسان ده .. فـ دي جمله عاوزة الحرق ..
لأن مش معني انى حفظت كتاب الاحياء من الجلده للجلده وشوية مواد .. يبقى انا انفع اكون دكتورة ..
ولا معنى انى اجيب 80 % انى مصلحش لأي كلية من كليات القمة !
الاحداث اللى بتحصل فى كل سنة دراسيه بالنسبالي مبتتغيرش ..
تفوقي فى الدراسه كان بالنسبه لى مجرد تحدي للظروف .. عاوزة اغلبها بأي شكل
بس لما وصلت للسنة دي ..
بقى عندي احساس مختلف وانا بذاكر ..
مش عارفه اى حاجة ولا ليا اي هدف ..
حتى معرفش انا بكتب الكلام ده ليه دلوقتي .. بس اهى مدونتي واغتت فيها براحتي بقى :D
لو حد غلط وقرأ الكلام ده ..
احب اقوله نورت .. وآسفين ع شوية الهرتله دول ..
تيت تيت تيت

نضارتي اتكسرت ..

اتباعاً لقاعدة مطرب الراب المفضل ليا " محمد اسامه " .. فى اغنيه " هاردي اتحرق "
قررت اكتب تدوينه بعنوان " نضارتي اتكسرت " ..
من ساعة ما نضارتي " الجديده " اتكسرت ،، والـ " قديمه " ضاعت الحمد لله
لا .. محستش انى فقر :D
بس بقيت شايفه الدنيا مغيمه جدا .. طشاش زي ما بيقولوا
الحقيقه انها كانت مغيمه من زمان .. بس كنت عارفه من جوايا من غير ما عنيا تشوف
بس لما شوفتها من غير اللمعه الحلوة بتاعت النضاره ..
عرفت اد ايه هى مغيمه
ايه الكلام ده ؟؟؟؟
مش فاهمه اى حاجة من اللى بقوله ع فكرة .. :D
كل الموضوع ان شكلى اتعودت ع الدنيا وهي كده ومش عاوزة ألبس نضاره جديده إلا لما احس انى فى حاجة جديده تستحق انى اشوفها ..
يعنى ..
ليه ألبس نضاره جديده تخليني اشوف بنات بتتسحل ع ايد الجيش مثلا ؟؟؟
او ليه ألبس نضاره جديده اتفرج بيها ع المسرحيه الهزليه الى بيسموها " محاكمة رموز النظام السابق " ؟؟
ليه اتفرج بيها ع جلسات مجلس الشعب .. واشوف الدم اللى مالى الكراسي ،، واشوف الفرحه بالسُلطه اللى فى عيون الاخوان والسلفيين اللى كانوا يخافوا يعدوا ادام مجلس الشعب ده اصلا ؟؟
ليه .. ؟
ليه اشوف الثورة وثمارها بيتباعوا ؟؟
ليه اشوف صفقات على حساب دمنا واعراضنا ؟؟

لو هتفضلي كده يا بلدي ..
خليني شيفاكي مغيمه احسن !

انا اسفه !

اليوم : الجمعه
التاريخ : 28 / 1 / 2011
المكان : بره بيتي .. بايته بره يعنى

- اااه ... صباح الخير يا جماعه ،،
- صباح النور ..
- بقولكوا ايه ... الموبايلات مش جايبه شبكه ليه ؟
- كلمى الشركه اسأليها
- طيب !!
خدمة عملاء فودافون من التليفون الارضي : - الو
- ايوة حضرتك انا خطي مش في شبكه خالص
- طب حضرتك شوفي كده يمكن المشكله من الموبايل ...
- موبايل ؟؟؟ لا انا موبايلي كويس
- خلاص انا هحل المشكله لحضرتك فى ثواني
-----------------------------------------------------------------------------------------------
ونعم خدمة العملا بصراحه ... 
ملحوظة " مفيش اي تليفزيون شغال ومكنش فى نت "

المهم ،،،
الليل جه ... في ايه نتفرج عليه فى التليفزيون يا حلوين ؟؟؟
الدش بايظ ..!
الله ينكد عليكوا ... استنوا التليفون الارضي بيرن
- ألو ..
- أيوة يا منة انتى كويسه ؟؟؟
- ايه يا بابي فى ايه هو انا فى افغانستان ...  الشركه بس قالولى ان الخط فيه مشكله
- شركة ايه يا حبيبة بابي البلد والعه !
- بلد ؟؟؟ والعه ؟؟؟
- ايوة وقاطعين النت والموبايلات عشان المظاهرات
- مظاهرات ؟؟؟
- ايه يا منة انتى مش مشغله تليفزيون .. ؟
- لا الدش هنا بايظ
- طيب بكرا من الصبح هعدي اخدك
- طيب اللى تشوفه !!!
---------------------------------------------------------------------------------------------
صباح جديد 29/1/2011
- يلا يا منة جهزتي ؟؟
- ايوة يا بابي نازله اهه ..
- ايه يا بابي فيه ايه ؟؟؟؟؟
- مظاهرات جامده فى التحرير و حاجات فى البلد عماله تتحرق والدنيا خربانه خالص
- يا عم تلاقيهم شوية عيال فاضيه مش لاقيين حاجة يعملوها !!
- طيب عاوزة حاجة نجيبها قبل ما نروح
- اه ياريت شوية فيشار بقى عشان نتفرج لما نروح

وصلت البيت ...
- بابي انا جبت القناة الاولى اهه .. تعالى شوف تعالى

طبعا مش محتاجة احكي .. " مكالمات مرعبه " .. " المتحف بيتسرق " ..  !!! وهكذا
لو اللى انا فكراه صح فا بيتهيألى ان ده اليوم اللى اتغيرت فيه الحكومة 

بابي : اهو غيرلهم الحكومة وجابلهم رئيس وزرا زي الفل .. يتهدوا بقى
انا : يا سيدي منا قولتلك فاضيين

انا على فكرة مكنتش اعرف اسم اي وزير ولا شكله ولا اى حاجة ... معرفش غير ان رئيس مصر هو حسني مبارك وبس !!

انا : بابي قولى صحيح .. هو مين احمد عز ده ؟
بابي : ده واحد حرامي كده ابن حلال ،، ده بتاع عز الدخيله يا منة
انا : عز الدخيله اه .. ما علينا .. طب والعادلى ده وزير ايه ؟
بابي : ده وزير الداخليه يا منة ارحميني
انا : ياسيدي شايفني يعنى عارفه وبستعبط .. تصدق الواحد جاي على باله يكتب قصيدة يشتم فيها شوية العيال دول .. ياربي ع حرقة الدم حاجة نكد !!
---------------------------------------------------------------------------------------------
عدى كام يوم لحد يوم 3 / 2 / 2011

كان في نت ...
انا : ريمو حبيبتي وحشاني .. فينك مش بتفتحي بقالك كتير ليه
ريم : منون ازيك ... معلش مشغوله عشان الثورة والاخبار وكده انتى عارفه بقى
انا : ثورة ؟؟ تانى هتقولولى ثورة ؟؟ ايه يابنتي اللى العيال دي بيعملوه ،.!
ريم : عيال ؟؟؟ يا منة ده حقهم وحقهم يطالبوا بأى مطلب شرعي ،، وحق اللى ماتوا يروح فين طيب ؟
انا : ماتوا ؟؟؟؟؟؟؟ هو في حد مات ؟؟؟؟؟؟
ريم : نعم ؟؟ افتحى قناة الجزيرة يا بنتي فوقي
انا : لا الجزيره بيقولوا اخبار غلط .. التليفزيون المصري قال كده
ريم : تليفزيون مصري ؟؟ عليه العوض !! معلش يا منة انا لازم اقفل ... سلام

---------------------------------------------------------------------------------------------

واستمر الحال ده بالنسبه لى كتير ... مش عاوزة اسمع حاجة >>> معنديش قابلية اتناقش
عاوزة ...
استقرار ،، شغل ،، سياحة ،،، عجلة انتاج
كنت زيي زي اي مواطن شريف حاليا واكتر كمان !!

------------------------------------------------------------------------------------------
بعدها بمدة اتعرفت على ناس من الى كانوا بينزلوا الميدان
وبدأت اسمع .. واشوف
اتكلم  ..
بدل ما اتخانق مع اللى بيقولى ثورة واقوله خربتوا البلد ومفيش أمن و و و إلى آخره ..
بقيت اسمع وادور واقرأ
اعرف بلاوي اللى كان بيحكمنا ده وبابي مصورلي انه هو " ملاك طاهر "

انا كنت مغيبه بمزاجي .. مش غصب عني
مكنتش بحب البلد عشان اخاف عليها .. عشان انا عارفه طول عمري ان حاميها حراميها وانها خربانه

-----

لما اتغيرت .. وبقيت مع الثورة
قالوا عليا انى بوشين ... بعيش اللحظة !
الموضوع مش كده خالص ..
انك تعرف غلطك وتعترف بيه وتبقى مع الحق .. احسن مليون مره ما تتمادى فى غلطك عشان مستكبر تقول انك غلطان !
مش عيب لما اقول انى  كنت بدافع عن مبارك بإستماااااااااته
وببهدل اى حد يغلط فيه ... نسخه من بابايا بمعنى اصح
لان مكنش فى غيره اسمع منه
لما كنت بروح المدرسه كنت بسيب اللى بيتكلموا عن الثورة دول عشان مخسرهومش ..

-----

دخولى عالم التويتر كان له تأثير اكبر عليا كمان ..
عرفت ناس جدعه اوى .. ناس بتحب البلد اوى
بقيت بخاف على بلدي فعلا ..
بقى عندي دم .. بحس لما اشوف دم سايل ادامى
بقى عندي هدف .. أمل نفسي يتحقق
مش انسانه تافهه متابعه اخبار تامر وحماقى !



انا حكيت كل ده عشان اقول اللى انا كاتباه فوق خالص ده .. ايوة " انا اسفه "
انا اسفه لأكتر من مليون واحد كانوا فى التحرير وفى المحافظات التانيه
اسفه انى قولت عليكوا عيال .. انتوا ارجل من اي واحد قاعد فى بيته وهو فى ايده ينزل
اسفه لكل واحد مات وفى يوم من الايام قولت " عادي " ..
دمك مش هيروح هدر !
اسفه لكل واحده / واحد من زمايلي زعلتهم وقولتلهم انتوا مش فاهمين حاجة عشان كانوا بيدافعوا عن الثورة والثوار

متزعلوش مني :) >> انتوا احسن ناس فى البلد دي كلها :)