انا اسفه !

اليوم : الجمعه
التاريخ : 28 / 1 / 2011
المكان : بره بيتي .. بايته بره يعنى

- اااه ... صباح الخير يا جماعه ،،
- صباح النور ..
- بقولكوا ايه ... الموبايلات مش جايبه شبكه ليه ؟
- كلمى الشركه اسأليها
- طيب !!
خدمة عملاء فودافون من التليفون الارضي : - الو
- ايوة حضرتك انا خطي مش في شبكه خالص
- طب حضرتك شوفي كده يمكن المشكله من الموبايل ...
- موبايل ؟؟؟ لا انا موبايلي كويس
- خلاص انا هحل المشكله لحضرتك فى ثواني
-----------------------------------------------------------------------------------------------
ونعم خدمة العملا بصراحه ... 
ملحوظة " مفيش اي تليفزيون شغال ومكنش فى نت "

المهم ،،،
الليل جه ... في ايه نتفرج عليه فى التليفزيون يا حلوين ؟؟؟
الدش بايظ ..!
الله ينكد عليكوا ... استنوا التليفون الارضي بيرن
- ألو ..
- أيوة يا منة انتى كويسه ؟؟؟
- ايه يا بابي فى ايه هو انا فى افغانستان ...  الشركه بس قالولى ان الخط فيه مشكله
- شركة ايه يا حبيبة بابي البلد والعه !
- بلد ؟؟؟ والعه ؟؟؟
- ايوة وقاطعين النت والموبايلات عشان المظاهرات
- مظاهرات ؟؟؟
- ايه يا منة انتى مش مشغله تليفزيون .. ؟
- لا الدش هنا بايظ
- طيب بكرا من الصبح هعدي اخدك
- طيب اللى تشوفه !!!
---------------------------------------------------------------------------------------------
صباح جديد 29/1/2011
- يلا يا منة جهزتي ؟؟
- ايوة يا بابي نازله اهه ..
- ايه يا بابي فيه ايه ؟؟؟؟؟
- مظاهرات جامده فى التحرير و حاجات فى البلد عماله تتحرق والدنيا خربانه خالص
- يا عم تلاقيهم شوية عيال فاضيه مش لاقيين حاجة يعملوها !!
- طيب عاوزة حاجة نجيبها قبل ما نروح
- اه ياريت شوية فيشار بقى عشان نتفرج لما نروح

وصلت البيت ...
- بابي انا جبت القناة الاولى اهه .. تعالى شوف تعالى

طبعا مش محتاجة احكي .. " مكالمات مرعبه " .. " المتحف بيتسرق " ..  !!! وهكذا
لو اللى انا فكراه صح فا بيتهيألى ان ده اليوم اللى اتغيرت فيه الحكومة 

بابي : اهو غيرلهم الحكومة وجابلهم رئيس وزرا زي الفل .. يتهدوا بقى
انا : يا سيدي منا قولتلك فاضيين

انا على فكرة مكنتش اعرف اسم اي وزير ولا شكله ولا اى حاجة ... معرفش غير ان رئيس مصر هو حسني مبارك وبس !!

انا : بابي قولى صحيح .. هو مين احمد عز ده ؟
بابي : ده واحد حرامي كده ابن حلال ،، ده بتاع عز الدخيله يا منة
انا : عز الدخيله اه .. ما علينا .. طب والعادلى ده وزير ايه ؟
بابي : ده وزير الداخليه يا منة ارحميني
انا : ياسيدي شايفني يعنى عارفه وبستعبط .. تصدق الواحد جاي على باله يكتب قصيدة يشتم فيها شوية العيال دول .. ياربي ع حرقة الدم حاجة نكد !!
---------------------------------------------------------------------------------------------
عدى كام يوم لحد يوم 3 / 2 / 2011

كان في نت ...
انا : ريمو حبيبتي وحشاني .. فينك مش بتفتحي بقالك كتير ليه
ريم : منون ازيك ... معلش مشغوله عشان الثورة والاخبار وكده انتى عارفه بقى
انا : ثورة ؟؟ تانى هتقولولى ثورة ؟؟ ايه يابنتي اللى العيال دي بيعملوه ،.!
ريم : عيال ؟؟؟ يا منة ده حقهم وحقهم يطالبوا بأى مطلب شرعي ،، وحق اللى ماتوا يروح فين طيب ؟
انا : ماتوا ؟؟؟؟؟؟؟ هو في حد مات ؟؟؟؟؟؟
ريم : نعم ؟؟ افتحى قناة الجزيرة يا بنتي فوقي
انا : لا الجزيره بيقولوا اخبار غلط .. التليفزيون المصري قال كده
ريم : تليفزيون مصري ؟؟ عليه العوض !! معلش يا منة انا لازم اقفل ... سلام

---------------------------------------------------------------------------------------------

واستمر الحال ده بالنسبه لى كتير ... مش عاوزة اسمع حاجة >>> معنديش قابلية اتناقش
عاوزة ...
استقرار ،، شغل ،، سياحة ،،، عجلة انتاج
كنت زيي زي اي مواطن شريف حاليا واكتر كمان !!

------------------------------------------------------------------------------------------
بعدها بمدة اتعرفت على ناس من الى كانوا بينزلوا الميدان
وبدأت اسمع .. واشوف
اتكلم  ..
بدل ما اتخانق مع اللى بيقولى ثورة واقوله خربتوا البلد ومفيش أمن و و و إلى آخره ..
بقيت اسمع وادور واقرأ
اعرف بلاوي اللى كان بيحكمنا ده وبابي مصورلي انه هو " ملاك طاهر "

انا كنت مغيبه بمزاجي .. مش غصب عني
مكنتش بحب البلد عشان اخاف عليها .. عشان انا عارفه طول عمري ان حاميها حراميها وانها خربانه

-----

لما اتغيرت .. وبقيت مع الثورة
قالوا عليا انى بوشين ... بعيش اللحظة !
الموضوع مش كده خالص ..
انك تعرف غلطك وتعترف بيه وتبقى مع الحق .. احسن مليون مره ما تتمادى فى غلطك عشان مستكبر تقول انك غلطان !
مش عيب لما اقول انى  كنت بدافع عن مبارك بإستماااااااااته
وببهدل اى حد يغلط فيه ... نسخه من بابايا بمعنى اصح
لان مكنش فى غيره اسمع منه
لما كنت بروح المدرسه كنت بسيب اللى بيتكلموا عن الثورة دول عشان مخسرهومش ..

-----

دخولى عالم التويتر كان له تأثير اكبر عليا كمان ..
عرفت ناس جدعه اوى .. ناس بتحب البلد اوى
بقيت بخاف على بلدي فعلا ..
بقى عندي دم .. بحس لما اشوف دم سايل ادامى
بقى عندي هدف .. أمل نفسي يتحقق
مش انسانه تافهه متابعه اخبار تامر وحماقى !



انا حكيت كل ده عشان اقول اللى انا كاتباه فوق خالص ده .. ايوة " انا اسفه "
انا اسفه لأكتر من مليون واحد كانوا فى التحرير وفى المحافظات التانيه
اسفه انى قولت عليكوا عيال .. انتوا ارجل من اي واحد قاعد فى بيته وهو فى ايده ينزل
اسفه لكل واحد مات وفى يوم من الايام قولت " عادي " ..
دمك مش هيروح هدر !
اسفه لكل واحده / واحد من زمايلي زعلتهم وقولتلهم انتوا مش فاهمين حاجة عشان كانوا بيدافعوا عن الثورة والثوار

متزعلوش مني :) >> انتوا احسن ناس فى البلد دي كلها :)